Agjencia e Ushqimit dhe Veterinarisë e Kosovës (AUV) ka njoftuar për tërheqjen e menjëhershme nga tregu të një serie të produktit ushqimor për foshnje APTAMIL, pasi është identifikuar prania e substancës Cereulide, e cila paraqet rrezik serioz për shëndetin.

Sipas AUV-it, përmes Sistemit të Alarmimit të Shpejtë për Ushqim dhe Ushqim për Kafshë (RASFF), është pranuar njoftimi me numër 2026.0598, i cili ka rezultuar me kërkesë për tërheqje urgjente të produktit nga tregu.

Produkt i prekur është APTAMIL AR 2 – formulë ushqimore për foshnje, paketimi ENG 24 x 400 gramë, i prodhuar nga Nutricia Infant Nutrition Ireland Ltd. (Danone), ndërsa importues në Kosovë është kompania UNION SH.P.K., Vushtrri.

AUV, në bashkëpunim me kompaninë importuese, ka ndërmarrë masa të menjëhershme për largimin e produktit nga tregu. Po ashtu, u bëhet thirrje konsumatorëve që posedojnë këtë produkt të mos e përdorin dhe ta kthejnë në pikat e shitjes.

Agjencia thekson se mbetet e përkushtuar në monitorimin e vazhdueshëm të tregut dhe në zbatimin e masave parandaluese dhe kontrolluese, me qëllim garantimin e sigurisë ushqimore dhe mbrojtjen e shëndetit të konsumatorëve në Republikën e Kosovës./Arbresh.info